काठमाडौं, श्रावण १९
अमेरिकाको टेक्सासस्थित इआई पासोमा अन्धाधुन्ध गोली प्रहार हुँदा कम्तीमा २० जनाको ज्यान गएको र २६ जना घाइते भएका अन्तराष्ट्रिय संचारमाध्यमले जनाएका छन् । घटना सिलो भिस्टा मल नजिकैको वालमार्ट स्टोरमा भएको खुल्न आएको छ । घटना भएको क्षेत्र अमेरिका र मेक्सिकोको सीमा नजिकैमा पर्दछ ।
आक्रमणमा ज्यान गुमाउने र घाईते हुनेहरूको पहिचान र यकिन संख्या अझै खुल्न सकेको छैन् । यद्यपि, मेक्सिकोले आफ्ना केही नागरिकहरु पनि उक्त घटनामा मारिएको दावी गरिरहेको छ ।
सीसीटीभीमा कैद भएको भिडियोमा कालो टिसर्ट र इअर प्रोटेक्टर लगाएका व्यक्तिले एसल्ट राइफलमार्फत अन्धाधुन्ध गोली बर्साएको देख्न सकिन्छ । प्रहरीले २१ वर्षीय युवक प्याटरिक क्रुसिअसलाई उक्त घटनामा संलग्न भएको आशंकामा नियन्त्रणमा लिएको छ । प्रहरीका अनुसार, प्रारम्भिक अनुसन्धानका क्रममा उनी दल्लास(अमेरिकाको एक ठुलो नगर) का भएको खुलेको छ ।
अमेरिका लगाएतका पश्चिमा देशहरुमा यस्ता घटना बढेपछि नागरिकलाई बन्दुक राख्न दिइँदै आएको सुविधाबारे बहस चल्न थालेको छ ।
