विराटनगर, मंसीर २३
निरज बस्नेत
विराटनगरको मेनरोडमा अवस्थित सेन्ट्रल मलमा रहेको सेन्ट्रल मल्टिप्लेक्समा शुक्रवारको ब्राजिल भर्सेज क्रोएसिया बीचको क्वार्टरफाइनल खेल देखाइने पक्का भएको छ ।
यसको लागि रु. २ सयको टिकट फिक्स गरिएको छ । नेपाली समय अनुसार यो गेम आज राती ८ः४५ मा शुरु हुनेछ । आजको खेल ब्राजिलले नै जित्ने धेरै फुटवलप्रेमीको प्रेडिक्सन रहेको छ । हुन त खेल हो । खेलमा यही टिमले नै जित्छ यसै भन्न सकिन्न ।
सर्वाधिक ५ पटकको विश्वविजेता ब्राजिलका प्लेइङ सेटका सवै खेलाडी पूरै लयमा छन् । टिटेको प्रशिक्षणमा ब्राजिलले आक्रमक खेलकला मैदानमा प्रस्तुत गरिरहेको छ । ब्राजिल थिएगो सिल्भाको कप्तानीमा रहेको छ । ब्राजिलका लागि नेयमर भरपर्दा फरवार्ड हुन् । यिनी पूरै ९० मिनेट मैदानमा डटेर खेल्न सक्ने ल्याकत राख्छन् ।
कसिमिरो, रिचार्लिसन, फ्रेड, लगायतका खेलाडी ब्राजिलका भरपर्दा छन् । समग्रमा ब्राजिलको पूरै टीम लयमा छ । यो पालीको वल्र्डकप ब्राजिलको पोल्टामा जाने फुटवलप्रेमी धेरैको दावी छ ।
आजै १२ः४५ मा अर्जेन्टिना भर्सेज नेदरल्याण्ड्स बीचमा दोस्रो क्वार्टरफाइनल गेम हुदैछ । यी दुइ खेलको विजेता बीचमा पहिलो सेमीफाइनल खेल हुनेछ । तसर्थ आजको दुवै खेल रोचक हुने अनुमान छ ।
